حاول رئيس بلدية القاع بشير مطر إقناع أهل بلدته بأن يلتزموا بقرار الاقفال العام ويتخذوا الاجراءات اللازمة لتفادي الاصابة بفيروس كورونا، بطريقة “لا عالبال ولا عالخاطر”!… فما علاقة النجمة العالمية مونيكا بيلوتشي؟
مونيكا ستزور أهالي القاع في بيوتهم تأكل وتشرب معهم “تشيل عرق ونبيد وترقص وتدبك وتغني” بحال التزموا بالاجراءات الوقائية… فهل ستنجح محاول رئيس البلدية لإقناع الاهالي وتزور بيلوتشي البلدة؟
إليكم ما كتبه رئيس البلدية عبر صفحته على “فيسبوك”:
مونيكا بللوتشي وعدتنا بزيارة عالقاع..
يلي بيقعد عاقل ومابيطلع من بيتو، مابعذب مرتو واهلو ، بحط كمامة مابيسلم بالايد ،بعقم ايديه ، بيشتري غراضو دليفري بيلتزم بالاجرءات…
بتزورو ،بتلعب ورق معو بتاكل كستنا ،كشك ،بتنجان مكدوس، لبنة، جبنة، ورق عريش وملفوف، كوسا محشي، قصبة ولحمة مشوية وكاس عرق…
بتروح معو عالبحيرة، عقناة الست بلقيس، عاخربة مائيه، عالجبل، وادي النصراني والكيف والقبو، قلعة فخر الدين ،جباب القنا، مغارة مار مارون ،القاموع ونهر العاصي…
بتقلع توم وبصل معو وبتقطف خس وملفوف وقرنبيط وبتعشب البازيلا والفول.. بتحضٌر الارض للمشمش والدراق والعنب والتين والخرما والعناب.. بتشيل عرق ونبيد بتسرح مع الغنمات والمعزة بتلم البيض البلدي والفطرة البرية بتاكل خبز عالتنور وبتشرب حليب طازة ..
بتزور المكتبة بتتناقش مع الشبيبة بقضاياهن والبراد الزراعي بتاخد شوية خضرة معها بتشق عاسوق الخضرة بتتصور معك بالجرد عالطرقات..
بتحل مشاكل السوامات والطرقات يلي بدا اعجوبة وبتشتغل بالسواقي الجديدة والارصفة..
بتزور بيوت التراب المدارس والكنايس والمزارات ومحطات الطاقة والابار وبتحفر اول رفش بالبحيرة الجديدة وبتحجز ارض لمصنع معكرونة بالمنطقة الصناعية بتلعب مع الولاد بالملعب البلدي والحديقة والمستوصف ،بتحضر قداس واجتماع مجلس بلدي بتمضي صورة وورقة عند المختار وبتحط عليها طابع القاع الصادر عن وزارة المالية وبتحط اكليل ورد عانصب الشهدا…
بتاخد معها هدايا مي زهر وزعتر وحلويات ومونة وشيح وصابون شغل ستات القاع وكتب عن القاع … اكيد رح تزور صياد الطيور وترقص وتدبك وتغني مع كبار الضيعة. اما النومة اما ببيوت الضيافة والشاليهات او عندي.
قعدوا ببيووتكن حافظوا عاحالكن وعاحبايبكن تتقدروا تتمتعوا بالجمال على انواعه”.
