ترامب عم بلّوح بفرض عقوبات جديدة على روسيا وإرسال أسلحة لدعم أوكرانيا بحال رفض الرئيس الروسي فلاديمير بوتين التفاوض لانهاء الحرب.
ورقة ضغط جديدة عم يستخدما الرئيس الأميركي لانهاء الصراع الاوكراني الروسي اللي مستمر من 2022 لليوم.
من 2014 والعقوبات قائمة على موسكو، وروسيا أظهرت قدرتها على التكيف مع الضغوط الاقتصادية كل هالسنين، يعني ما منعرف قديش رح يأثر موضوع العقوبات الجديدة على قرارات بوتين.
بالإضافة لانو موضوع تسليح أوكرانيا بيتعارض مع وعود ترامب السابقة برفضو دعم أوكرانيا عسكريا… يا ترامب غيّر رأيو بس وصل للرئاسة بموضوع الحروب الخارجية واحلال السلام، يا عم بهدد لتخويف روسيا وحث بوتين ليمشي بالمفاوضات مش أكتر.
يلي أكيدين منو انو الطرفين الاوكراني والروسي تنيناتن تعبو من هالحرب وخسائرن صارت كتيرة وأبدوا جهوزيتن للتفاوض أكتر من مرّة، بس كل طرف بعدو متمسّك بشروطو وعم يكابر ليطلع من هالحرب ربحان قدام شعبو.
فهل رح ينجح ترامب باخراجن من هالدوامة ويحل السلام بين البلدين؟
