على مدى يومين عم يناقش النواب تفاصيل البيان الوزاري يعني رجعنا لاستعراضات تلفزيونية للنواب يللي همّ اكتريتن الـshow بوقت القرار متخذ سلفاً، مع العلم انو مطلوب من هالبيان ما يكون انشائي متل كل البيانات السابقة.
أكتر من نص نواب المجلس رح يعلقوا عالبيان يلي بيتماشى بمضمونو مع خطاب قسم رئيس الجمهورية وكلمة رئيس الحكومة نواف سلام الأولى، فالبيان أقصى بمضمونو المقاومة وشدد على أحادية السلاح بايد الجيش اللبناني والتزام لبنان بالقرارات الدولية وأبرزها ال1701 والـ1559.
يعني من هلق عارفين أي فريق رح يعطي ثقتو للحكومة ومين رح يحجبا عنها، ومين حردان لأن ما طلعلو حصة هالمرّة. بس الاهم نشوف نواب حزب الله كيف رح يعطوا الثقة لحكومة مشتركين فيها وجمهورن بيعتبرها حكومة صهيو- اميركية!!!
حلفاء الماضي يلي حطو ايدن بايد بعض وعطلو استحقاقات وتعيينات كتيرة كرمال مصالحن اليوم قسم منن صار من المعارضين للحكومة الجديدة وللنهج لجديد يلي ماشي فيه العهد، والقسم التاني بالحكومة.
هلق بكل الحالات اذا حردو او اقتنعوا بواقعن الجديد هيي ذاتها لأن الحكومة رح تأخذ ثقة مجلس النواب، والوزراء استلموا كراسين بوزاراتن والشغل انطلق. على أمل نشوف الإنقاذ الفعلي بوزارات علي بابا.
