غادة عون فالة وقلبا معنا وعلينا. فبيومها الاخير بالعدلية حبت غادة عون تودعنا بدعاوى جديدة على الرئيس نجيب ميقاتي وخيّو طه ميقاتي والحاكم السابق لمصرف لبنان رياض سلامة بتهمة تبييض الأموال.
اهين شي على قاضية عهد جبران باسيل اصدار ادعاءات عن أبو جنب وبشكل عشوائي وبملفات صارت مدعية فيها شي ٥٠ مرة!
الرئيس ميقاتي رد على اتهامات عون يلي منا الاولى بحقه من قبل عون وحط الملف الجديد بعهدة القضاء.
سنين صرلها غادة عون بتسرح وبتمرح بالقضاء بالدعاوى يلي الها وما الها فيا لتمشي مصالح حزبها، وهيي القاضية يللي حكم عليها المجلس التأديبي للقضاة بأقسى عقوبة لقاضي وهيي الطرد…
ليش بآخر يوم الها تذكرت عون هالادعاء أو انو حبت تكون ختام مسيرتها مسك وتعمل شوشرة لو حتى كيف ما كان قبل ما تفل؟
مع احالة القاضية غادة عون للتقاعد منكون عم نطوي صفحة صعبة مرت عالقضاء اللبناني من تسييس للملفات واطلاق معارك سياسية على ضهر القضاء… والأهم هل رح يستعيد القضاء هيبتو من خلال محاكمة شاملة لغادة عون على كل مخالفاتها وانتهاكاتها للقانون وللعمل القضائي؟!
