الملف النووي الايراني عم يشهد تطورات متسارعة بالساعات الاخيرة. من ميلة بينحكى عن درس البيت الأبيض بجدية اقتراح إيران إجراء محادثات نووية غير مباشرة؛ بوقت عم تزيد فيه واشنطن عدد القوات الأميركية بالشرق الأوسط تحسبا لاختيار الرئيس دونالد ترامب تنفيذ ضربات عسكرية ضد إيران. وفيكم تقولوا أنو ترسانة الطائرات الحربية الأميركية التقيلة يللي صارت بالمنطقة انجابت لهدف واحد ما الو علاقة بالدبلوماسية وصارت جاهزة لتتفيذ أوامر الرئيس ترامب.
الكل عامل plan a وplan b لأزماتو الا لبنان اللي بعدو بيتحمل تداعيات أي مشكلة بتصير بالمنطقة، فكيف اذا كانت ايران بدائرة الخطر؟
المواجهة العسكرية تبدو حتمية بظل اقتناع الجميع باستحالة توصل الطرفين الايراني والاميركي لاتفاق. ولبنان مش بعيد عن المواجهة وعن جبهة اسناد ولو خجولة في حال حصلت. يعني كم صاروخ من الجنوب متل يلي شفناهن بالايام الماضية كفيلة بانو تفوتنا بحرب جديدة كمان ما النا فيا. فهل رح يتم السيطرة على ما تبقى من سلاح حزب الله ويتم تحييد لبنان عن اي مشكلة جديدة أو رح نضل ببلد كل من ايدو الو؟