ما نام وزير الداخلية أحمد الحجار عالشكاوى يلي وصلت للوزارة نهار انتخابات للشمال ويلي بتطال مخالفات لمحافظ الشمال رمزي نهرا.
بالفعل، الوزير وعد ووفي، تابع انتخابات الشمال وتخبيصات المحافظ وعلى كعبا طلب من الحكومة اقالة نهرا.
الحجار كشف من بعد اقالة نهرا انو طلب وضع المحافظ بالتصرّف ومجلس الوزراء اتخذ القرار لحين ما يتم تعيين بديل عنو.
الحجار أكد انو سبب الإقالة منو بسبب انتخابات طرابلس ولا انتماؤه لجهة سياسية… بس لحظة بهالمنطق ليه تم وضعو بالتصرف؟ وضعو بالتصرف يعني بيصير قاعد بالبيت ويقبض معاشو… اما اذا كان مرتكب فالاصح هوي احالته للتحقيق ومحاسبتو، بس انو وضعو بالتصرف من دون اسباب ساعتها ليه؟ ما بيصير تصرّف كيدي وخصوصا اذا مستغنيين عنو فليه بدو يبقى بالتصرف وخصوصا انو ما كان موظف بالملاك قبل تعيينو محافظ فليه بدو يصل يقبض معاش هوي وببيتو؟ واذا في اسباب لإقالتو ووضعو بالتصرف ليه ما بينحال عالتحقيق وبتتم محاسبتو؟ جد لازم تقرروا وتتصرفوا كدولة…
بكل طرابلس عم يوزعو البقلاوة ويزلغطو بشوارع المدينة، شو كان عامل المحافظ يلي يبدو ما كان محافظ عطرابلس تالناس عم تحتفل هيك؟
