تشرين الثاني كان مليان أخبار فنية كبيرة، أول شي، محاكمة الفنان فضل شاكر تأجّلت لـ3 شباط 2026، بعد ما طلبت وكيلته مهلة لتراجع ملفات القضية، ليضلّ الملف مفتوح وعيون الناس مترقّبة شو رح يصير قدّام المحكمة العسكرية.
وبالمقابل، نانسي عجرم خطفت الأنظار من آخر الدني، وقدّمت حفلة تاريخيّة بجاكرتا قدّام أكتر من 5 آلاف شخص، جمهور ما بيحكي عربي بس غنّى معا كلمة كلمة! الحفل تحوّل لحديث الإعلام بالعالم.
ومن الأخبار اللي ضجّت مواقع التواصل الاجتماعي، مسلسل “دبي بلينغ” يلي مكسّر الدني على نتفليكس، عم يُحكى إنّو الجهة المنتجة ناوية تعمل نسخة جديدة بس هالمرة بلبنان، وجلسات العمل ممكن تبلّش بداية السنة الجايي… يعني يمكن نشوف نسخة لبنانية من تلفزيون الواقع قريباً
أما تامر حسني، فبعد ما انتشرت أخبار عن خضوعه لعملية دقيقة بألمانيا، طلع بنفسه وأكّد إصابته بأزمة بالكِلى استدعت عملية طارئة لاستئصال جزئي من الكلية، وطمّن جمهورو وطلب منن يدعولو..
أما ماغي بو غصن، يلي ردّت لأول مرة على الانتقادات اللي انقالت بحقها وبحق شركة Eagle Films، قالت إنها ممثلة بتحب مهنتها وما بتحب المشاكل ولا الردود، وإنو نجاحها ونجاح زملائها واحد، وشكرت كل الفنانين يلي وقفوا معها من أول الطريق. ردّا إجا بعد تصريح نادين الراسي يلي عبّرت عن عتبها على ماغي.
وبهيك منكون خلّصنا جولة تشرين الثاني، بس الجايي أحلى، لأنّو بلّشت تدفّق أخبار مسلسلات رمضان، الأعمال، الكاستينغ، المفاجآت، وكل شي عم يجهّزوله النجوم للموسم الأكبر.
خليكن جاهزين… لأن موسم الأعمال الرمضانية عم ينطبخ عنار هادية!
