بعيدًا عن الأجواء الأمنية والسياسية المشحونة يلي عم تخيّم على لبنان، عم تتحضّر بلدة كفردبيان لإستضافة حدث ميلادي إستثنائي بعنوان “نرنّم عمانوئيل”، يلي رح يكون أطول ريسيتال ميلادي بالعالم.
ورح يمتدّ على مدار 170 ساعة متواصلة من الترنيم المباشر، من 16 كانون الأول حتى 23 كانون الأول، برعاية البطريرك الماروني الكاردينال مار بشارة بطرس الراعي، وبشراكة مع وزارتي الإعلام والثقافة.
وهالحدث رح يكون محاولة جدية لتسجيل رقم قياسي جديد بموسوعة غينيس العالمية.
أطلقت هالمبادرة المرنّمة ساندرا عقيقي، ورح تحتضنا ثانوية القلبين الأقدسين – كفردبيان، بالتعاون مع بلدية كفردبيان… والأهم، إنو ريع الريسيتال رح يروح لدعم ذوي الحاجات الخاصة.
والريسيتال رح يجمع جوقات من مختلف المناطق اللبنانية… وأكيد الدعوة مفتوحة لكل اللبنانيين للمشاركة.
وهيك، بتتحوّل كفردبيان بهالأيام الميلادية لمساحة صلاة وفرح ورجاء، بتجمع اللبنانيين على صوت الترانيم رغم كل التحدّيات… حدث بيحمل رسالة أمل، وبيأكد إنّو لبنان بعدو قادر يرنّم للحياة ويحطّم الأرقام القياسية.
