دوا مهرب، دوا مزور، دوا مقطوع.
هم قديم جديد رجع للواجهة ورجع يشغل بال المواطن مع الحملة الأمنية يلي عم يتم فيا ملاحقة مهربين وتوقيفن والتحقيق مع عدد من الصيادلة للتعامل معن.
هلق الخبرية بتريح المواطن من ميل وبتعتلو هم من تاني ميل.
أكيد السيطرة على سوق الدوا والتخلص من الادوية المزورة ضرورية وأساسية لصحة المواطن، خصوصة من بعد التخبيصات اللي صارت بآخر كم سنة مع الازمات يلي ضربت لبنان عموما وقطاع الادوية خصوصا، مع انقطاع قسم كبير من الادوية.
يعني كنا وصلنا لمرحلة حبة البنادول ما عدنا نلاقيا، ما عاد حدا فرقاني معو لا كيف الدوا فات ولا وين مصنع، صار الهم الأول هوي الحصول على هالدواء.
اليوم انطلق عهد الإصلاحات، ويبدو انو القطاع الصحي على رأس الليستا. هم الادوية المزورة قريبا رح يصير من الماضي مع سيطرة الأجهزة على المعابر الحدودية ومطار بيروت.
بس بيبقى هم المواطن اليوم هوي انقطاع الدوا فأدوية كتيرة وأساسية بعدو المواطن لليوم عم يعاني من فقدانها أو عم يشتكي من سعرا المرتفع.
يعني ما فينا يكون دوا بلبنان للأمراض المستعصية سعرو دوبل عن الدول الباقية.
العين اليوم مش بس عملاحقة المهربين، العين اليوم عالقطاع ككل وعلى ضرورة إعادة النظر بسوق الدوا بلبنان وتنظيمو وتوفيرو بأسعار منطقية للمواطن وبالتالي بيتسكّر الباب نهائيا عالمهربين.
View this post on Instagram