البابا هدانا بزيارتو فانوس السلام ونحنا حملنالو مشاكلنا وهمومنا بس بصورة معلّبة ومقدمة بطريقة أدهشت العالم كلو… دبكة وزفة وزلاغيط وحشود على كل طرقات لبنان.
بس نقول فانوس بيجي على راسنا دغري الفانوس السحري يلي قادر يحققلنا آمانينا وينهي مشاكلنا، بس فانوس النور يلي حملنا ياه البابا لاوون الرابع عشر بيحمل أكثر من رسالة. هو الفانوس يلي رح ينور ايماننا وطريقنا دينيا وحياتيا وانشالله سياسيا.
لبنان بدو السلام والبابا بزيارتو صلى معنا للسلام بلبنان والمشرق.
البطريرك الماروني الكاردينال مار بشارة بطرس الراعي وصل صوت كل شب وصبية بلبنان خلال لقاء الشبيبة ببكركي: الشباب بدن بناء لبنانَ الجديدٍ، لبنانَ يلي بيحتضنُ تعدّدَ انتماءاتِه الدينيّةِ والثقافيّة. شبابنا بدن وطن يكونُ فيه التنوّعُ غِنىً مش انقسامً، والسلامُ فيه يتفوق على البغض.
بالمقابل، البعض استغل الفرصة تيبرر نفسو وتيشتكي من الضربات الإسرائيلية على جنوب لبنان، فالرئيس بري ذكر البابا انو اول معجزة للمسيح كانت بالجنوب، الجنوب نفسو يلي إسرائيل مش راحمة الاهل والبيوت. أما نائب رئيس المجلس الاسلامي الشيعي الأعلى الشيخ علي الخطيب، فقال :” نحنا مش هواة حمل سلاح ومنحط قضية لبنان بين ايديكن لعلّ العالم بساعد بلدنا على الخلاص”.
البابا بزيارتو شدد على أهمية الحوار بين كافة اللبنانيين، هو فاهم مظبوط مشكلة لبنان والسياسيين بلبنان، ووضعو للبنان على سلم اولوياتو هوي لرسم خارطة طريق للبنانيين نحو السلام بلبنان وبالمنطة. الحوار بوصلنا للسلام وبوضع مصلحة الوطن أولوية لأنو مصلحتو أهم من مصالح الأطراف.