كتب يورغو البيطار
“عالشارع الاحد انا نازل… لا نازل كرمال حزب ولا شخص ولا وزير ولا نايب ولا مستوزر ولا طامح للنيابة ولا كرمال جوعى الشهرة وهواة التمختر امام الكاميرات.
لأول مرة بكون نازل كرمال حالي.. كرمال 29 سنة رح يخلصوا ويصيروا 30 وبعدا الوعود نفسها والعناوين نفسها والفساد نفسه والشعارات نفسها ونفس الاسطوانة الممجوجة بتنعاد سنة بعد سنة وحكومة بعد حكومة وعهد بعد عهد.
نازل كرمال بيي اللي قدم سنين شبابه لقضية محقة وانحبس كرمالها بأقبية النظام السوري، وبعدها صرلو سنين هو وزملاؤه بيطالبوا بحقوقن الاساسية اللي هي منا منة من حدا انما حق مكتسب لا جدال فيه، ولما قرروا يعطوهم ياها ربطوها بضرايب بتطال الطبقات الفقيرة بنفس مستوى الطبقات الغنية ليخلفوا الشعب ببعضه وكله كرمال تكمّل سرقاتهم وهدرهم وفسادهم وإفسادهم.
نازل كرمال امي وخيي واختي وابن عمي وابن خالي اللي ناطرين اول فرصة هجرة لان هون ما في مستقبل وشقة ما قادرين يشتروا الا ما يكونوا من المحظيين ولا قادرين يحلموا يبنوا مستقبل يأمننلن العيش بكرامة بلا ما يدقوا ابواب المسؤول ويطلبوا الرضى والطاعة والولاء.
نازل كرمال كل فيضان بالطرقات بيصير بعد كل شتوة وبتتبدهل الناس بالطريق وبتتزفت الطريق 10 مرات وبتضل الجور هي هي وبترجع بتتحفر لامدادات المي وبعدها للكهربا وبعدها للانترنت والسرقة دايرة والمحاسبة كلمة ناسيينا ببلدنا.
نازل كرمال مطار بتفوح منه كل انواع الروايح من فساد ومزارع وصفقات ومجارير، وكرمال مرفأ مفتوح للتهريب على مصراعيه وبيخسّرنا كشعب المليارات والمليارات وبيموّل الفساد فيه 10 سلاسل مع بعض…
نازل كرمال شنشطة الكهربا والمي والموتورات والسينترنات والانترنت المنهوب والتلفونات والخلوي المسروق وطوابير بهدلة الميكانيك والتقديم عالباسبور والملفات ما بتلخص…
نازل لأن ما في ملف فساد انفتح وتكمّل فيه للنهاية وولا مرة عرفنا مين السارق الحقيقي والناهب الكبير، ولأن لما يختلفوا ما بيخلّوا ملف الا وبيفتحوه عبعضن ولما يتفقوا بيصيروا الكل ملايكة وبتنطفي كل الاتهامات وبيصور اللي بيقول “لا” هو الشيطان والمفتن واللي ما بدو المصالحات والمصارحات.
نازل لان بكل بلد بزوره بتحسر نحن وين وهني وين من نضافة وازدهار ونقل عام واحترام للبشر والحجر والحيوان!!
نازل لأن المعطّل ببلدي بيصير رئيس والفاسد بيصير وزير والحرامي بيصير نايب ونازل لاكتر بكتييير بعد….
عالشارع الاحد انا نازل وبعرف ان يمكن الامل شبه مفقود بس عالأقل شرف المحاولة بيستحق الاحترام”.